Ech hu mäin Diplom a Mouddesign 2010 zu Tréier op der Fachhochschule ofgeschloss. A menger Diplomarbecht hunn ech och deemols schon mat bedréckte Stëffter geschafft, fir esou Owes- a Cocktailkleeder ze designen. Dëst huet mech dozou inspiréiert fir mäin eegent Moudlabel BySiebenaler ze grënnen. Hei probéiren ech ëmmer déi kënschtlerech Elementer aus Zeechnungen a Molereien, wéi och Fotoen, mat Stëffter ze kombinéiren. Esou versichen ech, fir Konscht an Impressiounen op Kleeder ze bréngen.

Ech sinn eng lëtzebuerger Kënschtlerin, Designerin an Néiësch, opgewuess an der “klenger Lëtzebuerger Schwäitz”. Déi néideg Experienz duerft ech während Stagen oder Arbecht an Däitschland (Memode), Paräis (Costantino&Ravaillac), Australien (Erasmus) a Süd Korea (Ji Haye for Yumi Katsura) machen, wou ech als Modelistin, Stylistin an Néiësch geschafft hunn.

2012 hunn ech de Brevêt de maîtrise comme couturière gemach a meng éischt Kollektioun u Schaler erausbruet. Och déi éischt Owes- an Hochzäitskleeder sinn an dëser Zäit entstan, a niewebäi hunn ech als Freelance fir divers Firmen geschafft. 2015 ass meng éischt Kollektioun un bedréckten Owes- an Hochzäitskleeder entstan, mam Schwéierpunkt, dat een dëss Kleeder och no dem groussen Dag nach kann undoen.

All Kleed soll d’Perséinlechkeet vun der Braut remginn, andems all eenzelnen Print individuell ugefärdegt gëtt. Esou erzielt all Kleed eng individuell Geschicht.

De Label “Made in Luxembourg”, den ech fir d’Owes-an Hochzäitskeeder, genee sou wéi fir d’Schaler hunn, steet fir d’Qualitéit a d’Zeréckgräifen op Lëtzebuerger Handwierk.